NEW YORK – Sinimulan ng Spotify noong Huwebes ang pagtanggap ng mga audiobook na ginamit ang digital na boses mula sa artificial intelligence (AI) software firm na ElevenLabs, bilang isang mas abot-kayang opsyon para sa mga may-akda.
Ang Sweden-based na music, book, at podcast streaming service ay unang tumanggap ng mga digitally narrated audiobooks noong 2023 sa pakikipagtulungan ng Google Play Books.
Ayon sa Spotify, ang mga audiobook na ginamitan ng AI voice narration ay may malinaw na indikasyon upang malaman ng mga tagapakinig na ito ay hindi ginamitan ng totoong boses ng tao.
Sa una nitong digital voice partnership sa Google, sinabi ng Spotify na ito ay isang “win-win” na sitwasyon para sa parehong mga may-akda at tagapakinig dahil mas marami ang magkakaroon ng access sa audiobooks.
“Kami ay nasasabik na simulan ang pagtanggap ng mga audiobook mula sa ElevenLabs, isang AI software company na nagbibigay ng madaling gamitin at mataas na kalidad na voice narration technology,” ayon sa blog post ng Spotify noong Huwebes.
Ayon pa sa kumpanya, ang mga may-ari ng aklat ay maaaring gumamit ng teknolohiya ng ElevenLabs upang isalin at i-narrate ang kanilang mga akda sa dose-dosenang wika, na may kontrol sa boses at intonasyon.
Samantala, ang Apple ay nag-alok na rin ng mga audiobook na ginamitan ng digital voices sa pamamagitan ng App Store mula pa noong unang bahagi ng 2023.
0 Mga Komento