Ang Kagawaran ng Edukasyon (DepEd) at Microsoft ay nagtutulungan upang isulong ang edukasyon sa Pilipinas gamit ang teknolohiyang generative AI at komprehensibong mga programa sa pagsasanay para sa mga mag-aaral at guro, bilang bahagi ng Presidential Digitalization Blueprint.
Sa pamamagitan ng isang patuloy na AI immersion program, ipinakilala sa mga guro ng DepEd ang potensyal ng AI sa pagpapabuti ng karanasan sa pag-aaral. Ang inisyatibong ito ay nagbigay-kakayahan sa mga guro sa buong bansa na gamitin ang Microsoft M365 Copilot sa kanilang mga gawain, na nagresulta sa mas interactive at nakakaengganyong paraan ng pagtuturo para sa mga mag-aaral, pati na rin ang mas mataas na kahusayan at produktibidad.
Ayon sa ulat mula sa Microsoft Copilot Classroom Hack activity, isang bahagi ng mas malawak na AI immersion initiative, nakakatipid ang mga guro ng humigit-kumulang siyam (9) na oras kada linggo sa mga pang-administratibong gawain—ang ilan ay umaabot pa sa dalawampung (20) oras—sa walong rehiyon ng DepEd. Ibinahagi ng mga kalahok ang malaking tulong ng Microsoft M365 Copilot sa pagpapadali ng mga gawaing administratibo, pagpapahusay ng kolaborasyon, at pagpapabuti ng mga estratehiya sa pagtuturo:
“Ang Copilot ay nag-a-automate ng mga karaniwang gawain sa administrasyon tulad ng paggawa ng lesson plan, pagsubaybay sa attendance, pagbuo ng ulat, at pagbibigay ng grado sa mga takdang-aralin. Dahil dito, makakatipid ako ng oras at mas makakapag-focus sa pakikisalamuha sa mga mag-aaral at pagpapahusay ng aking paraan ng pagtuturo,” ani ni Joseph Arnold Labaguis, isang guro sa Grade 10 mula sa Marinduque National High School.
Pinag-aaralan din ng DepEd ang karagdagang integrasyon ng Microsoft Copilot sa kanilang Central Office, pati na rin ang pagpapalawak ng AI skilling at fluency sa mas maraming guro sa iba’t ibang rehiyon.
Isa sa mga pangunahing layunin ng DepEd at Microsoft ay ang paggamit ng generative AI-powered teaching platforms gaya ng Reading Progress at Reading Coach. Ang mga ito ay mga tampok sa Microsoft Teams na tumutulong sa mga guro na masuri ang kahusayan sa pagbasa ng mga mag-aaral sa pamamagitan ng pagre-record ng kanilang pagbasa. Ang AI ay awtomatikong sinusuri ang kanilang katumpakan, bilis, at pagbigkas, na lubos na nagpapabilis sa proseso ng pagtatasa at nagbibigay ng mahalagang datos upang mapabuti ang pagganap ng mga mag-aaral.
Sa Bais City, Dumaguete, ang paggamit ng Reading Progress tool ay nagpabago sa paraan ng pagtatasa ng pagbasa ng mga mag-aaral, na nag-automate ng mga pagsusuri at nagdagdag ng datos sa Philippine Informal Reading Inventory upang palakasin ang mga remediation program. Sa pamamagitan ng isang virtual capacity-building workshop, 500 guro mula sa 65 paaralan ang sinanay, na nagresulta sa matagumpay na pagtatasa ng 14,000 mag-aaral at ganap na pagpapatupad ng programa sa 60 paaralan.
Nakikita ng mga guro ang malaking ginhawa at pag-unlad sa pagkatuto gamit ang Reading Progress. Mula sa dalawang araw, bumaba sa dalawang oras ang kinakailangang oras para sa assessment, at sa loob lamang ng tatlong buwan, napabuti ang antas ng pagbasa ng mga mag-aaral dahil sa tuloy-tuloy na pagsusuri. Pinapalakas din nito ang tiwala at kasarinlan ng mga estudyante, dahil nagkakaroon sila ng pagkakataong magsanay nang walang panggigipit ng tradisyunal na pagsusuri. Dahil maaaring gamitin sa iba’t ibang uri ng device, higit nitong pinapahusay ang karanasan sa pag-aaral ng parehong guro at mag-aaral.
Sa iba’t ibang Schools Division Offices sa buong bansa, ang Reading Progress ay ginagamit upang mapabuti ang mga programa sa pagtatasa at remediation ng pagbasa, na nakikinabang ang libu-libong guro at estudyante. Ginagamit ito ng DepEd Bais at iba pang regional offices upang suportahan ang patuloy na mga programa sa pagbasa at pagbutihin ang katumpakan ng pagtatasa, na nagpapatunay sa halaga ng AI-powered educational tools.
“Mayroon tayong napakalaking oportunidad at responsibilidad na mapabuti ang kalidad ng edukasyon para sa bawat Pilipino, at patuloy tayong magsisikap upang maisakatuparan ito, alinsunod sa plano ni Pangulong Ferdinand R. Marcos Jr. na tuldukan ang digital divide. Ang mga programang ito kasama ang Microsoft ay nagbigay ng agarang at malawakang resulta, at ipagpapatuloy natin ang integrasyon ng mga teknolohiya at ang pagbibigay ng kinakailangang kasanayan sa ating mga guro upang mapalaganap ang inobasyon sa bawat silid-aralan,” ani Kalihim ng Kagawaran ng Edukasyon, Sonny Angara.
“Ang AI ay marahil ang pinakamalaking rebolusyonaryong teknolohiya ng ating panahon, at nasa atin ang responsibilidad na tiyaking mapakikinabangan ito ng lahat,” ani Peter Maquera, CEO ng Microsoft Philippines. “May pagkakataon tayong alisin ang mga hadlang na matagal nang humaharang hindi lamang sa mas magagandang resulta ng pagkatuto kundi pati na rin sa mas mataas na kalidad ng buhay para sa lahat ng Pilipino. Kasama ang Kalihim Angara at ang Kagawaran ng Edukasyon, layunin naming gawing accessible ang AI, bigyang-kapangyarihan ang mga guro na magawa ang kanilang pinakamainam, at ihanda ang susunod na henerasyon para sa mga trabaho ng hinaharap.”
0 Mga Komento