Sa gitna ng mabilis na pag-usbong ng teknolohiyang artipisyal na intelihensiya (AI), nagsusumikap ang WhatsApp — isa sa pinakapopular na messaging apps na may mahigit 3 bilyong gumagamit sa buong mundo — na balansehin ang pagdagdag ng mga AI feature at ang pagpapanatili ng seguridad at privacy ng mga user nito.
Kilala ang WhatsApp sa paggamit ng end-to-end encryption, kung saan tanging ang sender at recipient lamang ang may access sa nilalaman ng kanilang usapan — ni WhatsApp o ang parent company nitong Meta ay hindi makakabasa nito. Ngunit dahil sa pagsasama ng mga AI feature tulad ng message summarization at writing suggestions, nagkaroon ng agam-agam ang ilang user: ligtas pa ba ang kanilang pribadong datos?
Upang tugunan ito, ipinakilala ng WhatsApp ang Private Processing — isang bagong cloud-based system na dinisenyo upang mapanatili ang mataas na antas ng privacy habang pinoproseso ang AI-related tasks. Ang teknolohiyang ito ay gumagamit ng tinatawag na Trusted Execution Environment (TEE), isang hiwalay at secure na bahagi ng processor na inilikha para hindi mapasok o magalaw ng kahit sino — kabilang na ang WhatsApp at Meta mismo.
Dagdag pa rito, inilahad din ng WhatsApp ang Advanced Chat Privacy, kung saan maaaring pigilan ng user ang ibang ka-chat na gamitin ang AI tools sa kanilang pag-uusap. Katulad ng "disappearing messages," maaaring i-toggle ang setting na ito ng sinuman sa chat, at makikita ng lahat ang pagbabagong iyon.
Ngunit kahit pa positibo ang paunang feedback mula sa mga eksperto, binabalaan ng ilan tulad ni Matt Green, isang cryptographer mula Johns Hopkins University, na may likas na panganib sa ganitong sistema. Dahil ang ilang datos ay kailangang lumabas mula sa mismong device upang maproseso ng AI, ang mga server kung saan ito ginagawa ay nagiging mas malaking target ng mga hacker o state-level attackers.
Sa kabilang banda, iginiit ng WhatsApp na dumarami na ang mga user na naghahanap ng AI tools upang mapadali ang kanilang pagmemensahe. Kaya't sa halip na hayaang lumipat ang mga ito sa ibang apps na mas mababa ang antas ng privacy, mas mainam umano na sila na mismo ang magbigay ng AI functionality — ng may kasamang privacy safeguards.
Hindi maikakaila na ang integrasyon ng AI sa mga private messaging platform tulad ng WhatsApp ay isang hamon sa pagitan ng kaginhawaan at kaligtasan. Habang patuloy ang eksperimento ng mga kumpanya tulad ng Meta sa larangang ito, mahalaga rin para sa mga gumagamit na maging mapanuri at maalam kung paano ginagamit — at pinoprotektahan — ang kanilang personal na datos.
0 Mga Komento