Singapore, Pinapalakas ang AI Security Defense Kontra Cyber Attacks

Patuloy na pinapalakas ng mga IT leaders sa Singapore ang paggamit ng artificial intelligence (AI) bilang pangunahing depensa kontra sa lumalalang cyber threats, ayon sa isang pag-aaral ng KnowBe4. Batay sa ulat, 56% ng IT leaders sa bansa ang nagsasabing ang AI security ay isa sa kanilang top five most beneficial defences, tumaas mula 47% noong nakaraang taon.

Ayon sa ulat, ang paggamit ng AI sa cybersecurity ay unti-unting nagiging mahalaga kasabay ng pag-usbong ng mas sopistikadong cyber attacks tulad ng phishing scams. Ipinakita ng pag-aaral na 72% ng IT professionals sa Singapore ang nagkamali sa pagkilala ng isang lehitimong email at inakala itong isang phishing attempt, na nagpapakita ng kahinaan kahit sa mga bihasa na sa larangan ng cybersecurity.

Bagamat patuloy na umaakyat ang pagtangkilik sa AI-powered security, napansin rin ng pag-aaral na bumababa ang investment sa ilang mahahalagang aspeto ng tradisyunal na cybersecurity measures. Kasama rito ang network security gaya ng firewalls, intrusion detection systems (IDS), at multifactor authentication (MFA), na bahagyang bumaba ang perceived importance kumpara noong 2024.

Isa rin sa naging pangunahing estratehiya sa pagtugon sa cyber threats ay ang collaboration sa pagitan ng mga organisasyon, gobyerno, at law enforcement agencies. Mahigit kalahati ng mga IT leaders ang nagsabing mahalaga ang pagbabahagi ng impormasyon upang palakasin ang depensa laban sa cyber attacks.

Gayunpaman, nabahala ang mga eksperto sa datos na nagpakitang bumaba ang investment sa mga pangunahing seguridad sa ilang organisasyon. Mula sa 64% noong 2024, bumagsak sa 57% ngayong taon ang pondo para sa cybersecurity awareness training. Bukod dito, bumaba rin ang investment sa cybersecurity software, pagbabago ng employee policies, simulated phishing exercises, at cybersecurity insurance.

Ayon sa KnowBe4, ang pagbagsak ng investment sa mga pangunahing security measures ay lubhang nakababahala, lalo na't ang Singapore ay itinuturing na pangatlo sa pinakamataas na digitally competitive economies sa mundo. Sa kasalukuyan, 18% ng GDP ng bansa ay nakadepende sa digital economy, kaya’t ang cybersecurity breaches ay maaaring magkaroon ng malaking epekto sa ekonomiya.

Ayon kay Martin Kraemer, Security Awareness Advocate sa KnowBe4, nagiging pangunahing target na ngayon ang Singapore ng mga sopistikadong cyber attacks dahil sa mabilis na digital transformation sa bansa. “Habang patuloy na lumalawak ang digital economy sa Singapore, nagiging mahalaga na pagsamahin ang lakas ng AI at kasanayan ng tao upang mapanatili ang isang matatag na depensa laban sa cyber threats,” ani Kraemer.

Dagdag pa niya, hindi sapat na umasa lamang sa AI-driven defense systems, bagkus ay dapat din umanong palakasin ang employee training at security awareness upang mapigilan ang posibleng cyber breaches. “Ang pinakamahusay na depensa ay nagmumula sa kombinasyon ng machine learning at human expertise,” dagdag ni Kraemer.