Ang glaucoma ay kilala bilang “silent thief of sight” dahil karamihan sa mga pasyente ay hindi namamalayan ang sakit hanggang sa magkaroon na ng malubhang at hindi na maibabalik na pagkawala ng paningin. Isang makabagong AI screening tool ang maaaring pumigil sa sakit na ito bago pa ito makapinsala.
Isipin na lamang ang pagpasok sa isang supermarket, istasyon ng tren, o shopping mall at makapagsagawa ng pagsusuri sa mata para sa glaucoma sa loob lamang ng ilang segundo—walang kinakailangang appointment. Sa pamamagitan ng AI-based Glaucoma Screening (AI-GS) network, maaaring maging realidad ang ganitong sistema.
Ang glaucoma ang nangungunang sanhi ng hindi na mababalik na pagkabulag sa Japan at sa buong mundo. Kritikal ang maagang pagtuklas, dahil unti-unting lumiliit ang peripheral vision ng isang pasyente nang hindi ito namamalayan. Dahil dito, marami ang hindi naagad nadidiyagnos, lalo na sa mga lugar na may kakulangan sa mga ophthalmologist at limitadong access sa pagsusuri.
"Dahil dito, bumuo kami ng isang bagong mabilis at portable na paraan ng pagsusuri. Sinusuri nito ang maraming pangunahing indikasyon ng glaucoma, pinagsasama ang mga resulta, at tinutukoy ang presensya ng sakit na may pambihirang katumpakan," paliwanag ni Propesor Toru Nakazawa ng Tohoku University.
Ang AI-GS ay binuo ng isang research team sa pangunguna nina Nakazawa at Associate Professor Parmanand Sharma mula sa Graduate School of Medicine ng Tohoku University.
Paano Gumagana ang AI-GS?
Sinusuri ng AI-GS network ang larawan ng retina gamit ang isang fundus camera. Ang AI system ay gumagamit ng lightweight AI models upang pag-aralan ang imahe, tukuyin ang mga glaucoma-related features, at magbigay ng diagnosis. Pagkatapos ng masusing pagsusuri, naglalabas ito ng huling rekomendasyon: "Normal" o "Kumonsulta sa isang ophthalmologist."
Sa isang pagsubok gamit ang 8,000 fundus images, nakamit ng AI-GS ang 93.52% sensitivity sa 95% specificity—katumbas ng kakayahan ng isang eksperto sa ophthalmology. Naiiba ito sa tradisyunal na AI models dahil mahusay ito sa pagtukoy ng early-stage glaucoma, kahit sa mga kaso kung saan halos hindi pa halata ang abnormalities sa mata.
Isa sa mga hamon sa AI-driven healthcare ay ang kakulangan sa transparency, na tinatawag na "black box" problem—kung saan hindi malinaw kung paano nakararating ang AI sa isang diagnosis. Solusyon dito ang AI-GS sa pamamagitan ng pagbibigay ng numerical values para sa bawat diagnostic feature, kaya’t madaling maunawaan at mapatunayan ng mga ophthalmologist ang proseso ng pagsusuri.
Bukod dito, binigyang-diin din ang portability ng sistema. May sukat lamang itong 110 MB at nangangailangan ng minimal computational power, kaya makapagbibigay ito ng diagnostic results sa loob ng isang segundo.
"Dala ng AI-GS ang expert-level glaucoma screening sa iyong bulsa, bilang suporta sa pagsusuri ng mga espesyalista," ani Associate Professor Parmanand Sharma. "Dahil portable ito, maaari itong gamitin sa iba’t ibang pampublikong lugar—sa mga istasyon ng tren o sa mga liblib na lugar na walang sapat na access sa ophthalmologists."
"Nilulutas ng AI technology na ito ang isang kritikal na hadlang sa pagtuklas ng glaucoma sa pamamagitan ng pagbibigay ng abot-kayang specialist-level diagnostics sa mga komunidad na kulang sa access sa serbisyong medikal," dagdag ni Professor Nakazawa. "Sa maagang pagtuklas sa malawakang saklaw, may potensyal tayong maiwasan ang pagkabulag ng milyun-milyong tao sa buong mundo."
Sa mataas na accuracy, malinaw na AI decision-making, at lightweight na disenyo, ang AI-GS network ay isang malaking tagumpay sa AI-driven ophthalmology. Sa malawakang paggamit nito, maaari nitong baguhin ang pangangalaga sa glaucoma—ginagawang mas abot-kaya at mas madali ang screening, upang mas maraming tao ang maagapan bago pa lumala ang kanilang kondisyon.
0 Mga Komento