AI SA EDUKASYON
Habang patuloy na isinusulong ang makabagong teknolohiya sa edukasyon, ipinahayag ni Education Secretary Sonny Angara ang kanyang kumpiyansa sa potensyal ng Artificial Intelligence (AI) upang mapabuti ang kalidad ng edukasyon sa Pilipinas.
Sa isang ambush interview sa gilid ng AI Horizons PH 2024 Conference ng University of the Philippines (UP), sinabi ni Angara na ang paggamit ng AI ay maaaring makatulong sa pagpapabuti ng sistema ng pagkatuto.
“Talagang pinag-aaralan namin ano iyong posibilidad diyan. Kasi nakikita natin, may pakinabang talaga diyan yung mga guro, meron din pakinabang sa mga estudyante,” aniya.
Paano Makakatulong ang AI?
Ayon kay Angara, malaki ang maitutulong ng AI sa mga guro sa pagbibigay ng mas epektibong pagtuturo.
“Parang matitipid ng oras ni teacher dahil makapag-focus siya doon sa mga nangangailangan. Tapos iyong mga advanced students, pwede na rin mauna kasi sa tulong ng AI,” dagdag niya.
Ngunit, binigyang-diin din ng kalihim na bago maisakatuparan ang ganitong mga inobasyon, kinakailangan munang tugunan ang kakulangan sa kuryente ng mahigit 2,000 paaralan at ang pangangailangan ng 40,000 paaralan para sa electricity upgrades.
“AI ay nangangailangan ng sapat na kuryente at maayos na internet connection. Kaya dapat nating tiyakin na kayang suportahan ng ating mga paaralan ang teknolohiyang ito,” aniya sa kanyang talumpati sa kumperensya.
Bago pa man ang AI, sinabi rin ni Angara na may mga umiiral nang partnership ang DepEd sa iba’t ibang software at digital tools tulad ng Khan Academy, I AM The Code, at Canva upang mapalakas ang sistema ng edukasyon.
 |
| Balitang AI Founder and Creator Pocholo De Leon Gonzales with DEPED Sec. Sonny Angara |
AI sa Pamamahala
Samantala, ayon sa mga eksperto mula sa UP, hindi lamang sa edukasyon maaaring magamit ang AI kundi pati na rin sa iba pang aspeto ng pamamahala.
“Ang AI-powered Research and Innovation Conference ng UP ay kakaiba dahil bukod sa AI expertise, mayroon din tayong AI-powered experts sa agrikultura, pangisdaan, at paghahayupan para sa seguridad sa pagkain,” ayon kay UP Special Adviser to the President for Research and Innovation Giselle Concepcion.
Dagdag pa niya, ang AI ay maaaring makatulong sa mga pangunahing isyu ng bansa tulad ng trabaho, disaster management, pagbabago ng klima, at operasyon ng lokal na pamahalaan.
Sa dalawang araw na AI Horizons PH 2024 Conference, tampok ang iba’t ibang AI projects na may kinalaman sa edukasyon at pamamahala. Kabilang dito ang mga makabagong proyekto sa object detection, speech technology, environmental governance para sa biodiversity databases, automated essay scoring systems, at road monitoring systems.
Sa patuloy na pag-unlad ng AI, umaasa ang DepEd na makakahanap ng mga solusyon upang gawing mas epektibo at inklusibo ang edukasyon sa Pilipinas.
0 Mga Komento